06/05/2026
تخيل تشتري ماكينة بـ 600 ألف .. وتخلي القوائم المالية تبان إن شركتك خسرانة 550 ألف في شهر واحد بسبب غلطة محاسبية
تخيل معايا السيناريو البسيط ده
لو في شهر مارس مبيعات شركتك كانت 50,000 جنيه، وفي نفس الشهر قررت تطور الشغل وتشتري ماكينة إنتاج جديدة بـ 600,000 جنيه
(وعشان نسهل الفكرة، هنفترض إن مفيش أي مصاريف تانية ولا قيمة تخريدية للماكينة، وبافتراض إن الماكينة أصبحت جاهزة للاستخدام والتشغيل فوراً)
هل هيفرق لو سجلنا الماكينة كمصروف بدل ما نسجلها أصل؟
آه طبعاً يفرق .. والفرق ده ممكن يقلب القوائم المالية بالكامل
يعني لو المحاسب خد الـ 600 ألف رماهم كلهم في بند المصروفات في شهر مارس، إيه اللي هيحصل؟
لما تيجي تحسب ربحك أو خسارتك الشهر ده:
إيراداتك (50 ألف) - مصروفاتك (600 ألف)
= الشركة كده طالعة خسرانة 550 ألف جنيه في شهر واحد
طيب ندخل على شهر أبريل
الماكينة لسه شغالة وبتنتج عادي، ونفرض الشركة باعت بـ 50,000 جنيه برضه
لكن لأنك سجلت الـ600 ألف كلهم كمصروف في مارس، فشهر أبريل مش هيتحمل بأي جزء من تكلفة الماكينة
وبالتالي هيبان إن أبريل كسبان 50 ألف جنيه صافي بالكامل
هل الكلام ده منطقي؟ .. أكيد لأ
حرام إن شهر مارس يشيل التكلفة دي كلها لوحده وتطلع القوائم المالية خسرانة، في حين إن الماكينة دي هتعيش معاك وتنتج وتجيبلك إيرادات لمدة 10 سنين قدام مثلاً
كده كل الشهور والسنين اللي بعد شهر مارس بيستفيدوا من الماكينة ببلاش على قفا شهر مارس
وهنا بيظهر الحل المثالي وهو (الإهلاك) .. يعني توزيع تكلفة الأصل الثابت على الفترات اللي هتستفيد منه خلال عمره الافتراضي
يعني بدل ما نحمل تكلفة الأصل كله على سنة واحدة أو شهر واحد، بنوزع التكلفة على السنين اللي الأصل هيخدم فيها البيزنس
عشان كده الماكينة دي بتتسجل في الدفاتر كـ (أصل) من ممتلكات الشركة، مش مصروف يطير في لحظتها .. وبعدين نوزع التكلفة دي على عمرها الافتراضي (وليكن 10 سنين):
يعني بدل ما نبوظ أرباح شهر مارس ونحمله بـ 600 ألف جنيه مره واحدة
فنبدأ نوزع تكلفة الماكينة على عمرها المتوقع .. وبالتالي كل سنة تتحمل بجزء من تكلفة الماكينة
وبنحسبها كده:
قسط الإهلاك السنوي:
= 600,000 جنيه ÷ 10 سنين (العمر المتوقع للماكينة)
= 60,000 جنيه
(وده كده قسط الإهلاك السنوي)
عاوزين بقه نعرف نصيب كل شهر كام من الاهلاك فنقسم المبلغ على 12 اللي هما عدد شهور السنة
= 60,000 جنيه ÷ 12 شهر
= 5,000 جنيه في الشهر
(وبما إن الماكينة اشتغلت من بداية الشهر، يبقى نصيب الشهر 5000 جنيه بالتمام)
فهنسجل 5,000 جنيه كل شهر (مارس، أبريل، مايو.. الخ) كمصروف إهلاك لمدة 10 سنين، بحيث تتحمل كل فترة بجزء من تكلفة الماكينة خلال عمرها المتوقع
يعني من الآخر كده .. أي أصل هيعيش معاك ويخدم البيزنس سنين، مينفعش تحمل تكلفته على شهر واحد أو سنة واحدة بس
لازم توزع تكلفته على الفترات اللي هتستفيد منه (العمر الإنتاجي المتوقع) عشان كل فترة تتحمل بنصيبها العادل، والقوائم المالية تطلع معبرة عن الواقع بشكل صحيح
