19/01/2023
ထိုင်းရေနံတင်သင်္ဘော ပေါက်ကွဲမီးလောင်မှုမှာ မြန်မာလုပ်သား ၇ ဦး သေဆုံး
ထိုင်းနိုင်ငံ၊ မဲ့ခလောင်မြစ်ကမ်း သင်္ဘောကျင်းမှာ ပြုပြင်ထိန်းသိမ်းနေတဲ့ ရေနံတင် သင်္ဘော ပေါက်ကွဲမီးလောင်မှုမှာ ပျောက်ဆုံးတဲ့မြန်မာလုပ်သားတွေရဲ့ အလောင်းတွေကို ဒီနေ့ ညနေပိုင်းမှာ ပြန်ရှာတွေ့ပြီလို့ သိရပါတယ်။
သင်္ဘောကို ပြုပြင်ရေးလုပ်နေချိန် ပိုက်တွေဖြတ်တောက်တုန်း မီးပွားကျပြီး မနေ့ မနက်ပိုင်းမှာ ပေါက်ကွဲမီးလောင်ခဲ့တာဖြစ်ပါတယ်။
ပေါက်ကွဲမီးလောင်မှုဖြစ်ချိန်မှာ မြန်မာအလုပ်သမား ၂၀ နီးပါးဟာ သင်္ဘောရဲ့ ဦးပိုင်း၊ အလယ်ပိုင်းနဲ့ ပဲ့ပိုင်းမှာ အသုတ်ခွဲ အလုပ်လုပ်နေကြတာဖြစ်ပြီး ပေါက်ကွဲမှုဟာ သင်္ဘောအလယ်ပိုင်းမှာ ဖြစ်ခဲ့တာပါ။
’’အလောင်းတွေ ပြန်တွေ့တဲ့အချိန်မှာ သက်ဆိုင်ရာမိသားစုဝင်တွေက လာအတည်ပြုကြတာရှိတယ်။ တစ်လောင်းပဲ အတည်မပြုနိုင်သေးတာပါ။ ဆေးမှုခင်းဆိုင်ရာအတည်ပြုဖို့ အလောင်းတွေကို ဆေးရုံ ပို့ထားရတယ်။ သေဆုံးသူတွေအကုန်လုံးက နိုင်ငံကူးလက်မှတ်ရှိပြီး ဒီမှာ အစိမ်းရောင်ကတ် ကိုင်ထားကြသူတွေပါ။ လူမှုဖူလုံကြေးလည်း ထည့်ထားကြတော့ မနက်ဖြန်မှာ ပခန်ဆာခွန်အဖွဲ့က စျာပနကြေး လာပေးလိမ့်မယ်’’လို့ မြန်မာတွေအရေး အကူအညီပေးနေသူတစ်ဦးက ပြောပါတယ်။
