10/08/2025
نادرا نے جانشینی سرٹیفکیٹ کا حصول مزید آسان بنا دیا
وراثتی جائیداد کہیں بھی ہو، جانشینی سرٹیفکیٹ کی درخواست اب ملک بھر میں نادرا کے متعلقہ مراکز پر جمع کرائی جا سکتی ہے
نیشنل ڈیٹابیس اینڈ رجسٹریشن اتھارٹی (نادرا) نے شہریوں کے لئے جانشینی سرٹیفکیٹ کا حصول مزید آسان بنا دیا ہے۔ نادرا کی طرف سے جاری کئے گئے ایک نئے نوٹیفکیشن کے مطابق اب وراثتی جائیداد پاکستان کے کسی بھی صوبے میں ہو، قانونی ورثاء اس کا جانشینی سرٹیفکیٹ حاصل کرنے کی درخواست اسلام آباد سمیت ملک کے چاروں صوبوں (پنجاب، سندھ، بلوچستان اور خیبرپختونخوا) اور گلگت بلتستان میں نادرا دفاتر اور دیگر مقامات پر قائم 186 جانشینی سہولت مراکز یا سکسیشن فیسلیٹیشن یونٹس پر جمع کرا سکتے ہیں۔ اسی طرح قانونی ورثاء کی بائیومیٹرک تصدیق کی سہولت بھی مزید بہتر بنا دی گئی ہے اور اب یہ کارروائی کسی بھی مقررہ قریبی مرکز میں جا کر مکمل کی جا سکتی ہے یا قانونی ورثاء اس مقصد کے لئے نادرا کی پاک آئی ڈی موبائل ایپ بھی استعمال کر سکتے ہیں۔ سابقہ طریقہ کار کے تحت جانشینی سرٹیفکیٹ کی درخواست صرف اسی صوبے میں جمع کرانا لازم تھا جہاں وراثتی جائیداد موجود ہو جس کی وجہ سے دیگر شہروں میں مقیم شہریوں کو پریشانی کا سامنا کرنا پڑتا تھا۔ نادرا نے پہلے مرحلے میں بائیومیٹرک تصدیق کی سہولت پاک آئی ڈی موبائل ایپ پر متعارف کرائی تاہم درخواست جمع کرانے کے لئے متعلقہ صوبے کی شرط اب بھی موجود تھی۔ نادرا کی اس نئی سہولت کی بدولت شہریوں کے لئے جانشینی سرٹیفکیٹ کا حصول مزید آسان ہو گیا ہے اور وہ کسی بھی صوبے کے متعلقہ نادرا دفتر، جہاں جانشینی سہولت مرکز قائم ہو، میں اپنی درخواست جمع کرا سکتے ہیں۔ بائیومیٹرک تصدیق کے لئے قانونی ورثاء نہ صرف نادرا کے کسی بھی مرکز پر آ سکتے ہیں بلکہ نادرا کی پاک آئی ڈی موبائل ایپ سے بھی فائدہ اٹھا سکتے ہیں۔ ترجمان نادرا کے مطابق اس سلسلے میں نادرا ہیڈکوارٹرز کی جانب سے تمام متعلقہ دفاتر کو نوٹیفکیشن جاری کر دیا گیا ہے اور شہری اب اس سہولت سے فائدہ اٹھا سکتے ہیں۔
