https://www.facebook.com/125022697361156/

محاسب بزاوية 180- Hadeer Samaha

Home
United Arab Emirates
Dubai
محاسب بزاوية 180- Hadeer Samaha

Directions

Contact information, map and directions, contact form, opening hours, services, ratings, photos, videos and announcements from محاسب بزاوية 180- Hadeer Samaha, Accountant, Dubai/World Trade Center/Sheikh Zayed Road, Dubai.

"محاسب بزاوية 180"
- بنفهمك محاسبه من زاويه مختلفه
- لو طالب او محاسب او حتي صاحب مشروع كل اللي هتحتاج تفهمه عن الحسابات هتلاقيه موجود
- تابعنا وسيب سؤالك والباقي علينا

30/10/2026

حديث تخرج او لسه في الجامعه
تايهه ومش عارف تلك الملعومات الكثير اللي بتسمعها
الفيديو دا ليك

#محاسبة

23/10/2026

ازاي أعالج تاثير سعر الصرف على شراء الأصول بتاعتي

# محاسب_بزاوية180

21/10/2026

صباح الخير
تعالو نكمل كلام عن الأصول ونأخذ حاجه لطيفه جدا

وهيا هل كل المصاريف اللي بصرفها علي الأصل هزودها على قيمه الاصل ولا هتبقى كلها مصاريف مادام أنا خلاص سجلت التكلفه المبدأيه بتاعته

حالي فاتورة مكتوب عليها «صيانة ماكينة» بـ٣٠ ألف جنيه… أسجّلها ازاي

شوف يا عزيزي… اسم الفاتورة مش هو اللي بيحدد المعالجة المحاسبية!

خلينا نفهم إيه اللي حصل فعلًا 👇

لو غيّرنا زيت، وشحّمنا، وعملنا خدمة دورية عشان الماكينة تشتغل كالمعتاد، فدي Day-to-day Servicing — صيانة دورية، وتكلفتها بتتسجل مصروف عند حدوثها.

لكن لو استبدلنا موتور رئيسي، ومتوقع نستفيد منه خلال فترات جاية، وتكلفته نقدر نقيسها بشكل موثوق؟

هنا، وفقًا لمعيار IAS 16، بنضيف تكلفة الجزء الجديد للأصل عند استيفاء شروط الاعتراف.

وخد بالك من نقطة مهمة:

مش لازم الموتور الجديد يخلّي الماكينة أحسن من يوم ما اشتريناها!

استبدال مكوّن ممكن يتسجل ضمن الأصل حتى لو رجّع الماكينة لأدائها الطبيعي، طالما شروط الاعتراف متحققة.

طيب نضيف الجديد ونقفل الموضوع؟

لسه… القديم هنعمل فيه إيه؟ 👀

خلينا ناخد مثال:

▪️ القيمة الدفترية للماكينة قبل الاستبدال: ٨٠ ألف جنيه.
▪️ ضمنها موتور قديم قيمته الدفترية: ١٠ آلاف جنيه.
▪️ تكلفة الموتور الجديد: ٣٠ ألف جنيه.

نستبعد القيمة الدفترية للموتور القديم، ونضيف تكلفة الجديد:

٨٠ − ١٠ + ٣٠ = ١٠٠ ألف جنيه.

دي القيمة الدفترية بعد الاستبدال في مثالنا.

والـ١٠ آلاف بتاعة الموتور القديم؟ بافتراض مفيش متحصلات من التخلص منه، بتتسجل خسارة استبعاد في الربح أو الخسارة.

ما ينفعش القديم يفضل جوه الأصل، والجديد يدخل فوقه… كأن الماكينة عندها موتورين!

ولو القديم ما كانش متسجل بشكل منفصل، ده ما يلغيش ضرورة استبعاده؛ بنحتاج نحدد قيمته الدفترية بالتقدير المناسب وفق المعيار.

وبعدها نحدد العمر الإنتاجي وطريقة الإهلاك المناسبة للجزء الجديد.

يعني قبل ما تسجل اي حاجه لازم تفكر هيا اثرت علي ايه وهتعامل معاها ازاي

18/10/2026

عزيزي المحاسب صباح الخير ☀️
الماكينة واقفة بقالها شهرين…هل أوقف إهلاكها لحد ما ترجع تشتغل؟ 🤔

ممكن تحس إن ده منطقي:🧐
«أنا مش بستخدمها، يبقى مش باستهلكها!»

بس محاسبيًا، الموضوع مش كده يا عزيزي.

خلينا نفترض إن عندنا ماكينة جاهزة للاستخدام
، وبنحسب إهلاكها بطريقة القسط الثابت — Straight-line Method.

الطلبات قلّت، فالإدارة قررت توقف الإنتاج شهرين.

هل نوقف الإهلاك معاها؟

لأ. وفقًا لمعيار IAS 16، مجرد توقف التشغيل مش سبب لإيقاف الإهلاك.

طيب ليه؟

لأن التشغيل مش العامل الوحيد اللي بيستهلك منافع الأصل. مرور الوقت، والتقادم التكنولوجي، وحتى التآكل أثناء التوقف، ممكن يأثروا عليه.

خلينا ناخد مثال بسيط 👇

القيمة القابلة للإهلاك للماكينة، بعد خصم قيمتها المتبقية، ١٢٠ ألف جنيه، وعمرها الإنتاجي ٥ سنين.

يبقى بالقسط الثابت:

▪️ الإهلاك السنوي = ١٢٠ ألف ÷ ٥ = ٢٤ ألف جنيه.
▪️ الإهلاك الشهري = ٢٠٠٠ جنيه.

وقفناها شهرين؟

إهلاك الشهرين، الـ٤ آلاف جنيه، لسه بيتحسب.

لكن خد بالك من فرق مهم:

لو الشركة بتستخدم طريقة وحدات الإنتاج
— Units of Production، وكانت فعلًا بتعكس نمط استهلاك منافع الماكينة، فعدم الإنتاج ممكن ينتج عنه إهلاك صفر للفترة.

وده بسبب طريقة الإهلاك المناسبة للأصل…
مش لأن عندنا قاعدة بتقول: «أي ماكينة واقفة نوقف إهلاكها».

ومش بنغيّر الطريقة لمجرد إننا عاوزين نقلّل المصروف!

خلي بالك أنا وقفت المكنه شويه بس هرجع اشغلها تاني مش قررت أبيعها

لان تصنيف الأصل كمحتفظ به للبيع وفق IFRS 5، فدي حالة تانية بشروط مختلفة، زي ما شرحنا قبل كده.

16/10/2026

تكاليف إزاله الأصل
ازاي احسبها وأضيفها علي تكلفه الأصل

14/10/2026

جالك فاتورة ماكينة بـ١٠٠ ألف… فدخلتها أصل بـ١٠٠ ألف وخلاص؟ 🤔

استنى يا عزيزي… الفاتورة ممكن تكون أول سطر في حساب تكلفة الماكينة، مش آخر سطر!

طيب إزاي؟
خلينا نفهم 👇

وفقًا لمعيار IAS 16، تكلفة الماكينة مش سعر شرائها بس؛ بتشمل كمان التكاليف المباشرة اللازمة عشان توصل للمكان والحالة اللي تخلّيها قادرة تشتغل بالطريقة اللي الإدارة تقصدها.

خلينا نفترض إن الشركة دفعت:

▪️ ١٠٠ ألف سعر الماكينة بعد الخصم.
▪️ ٨ آلاف نقل للموقع.
▪️ ١٢ ألف تركيب ضروري.
▪️ ٣ آلاف اختبار للتأكد إن الماكينة بتشتغل بشكل سليم.
▪️ ٥ آلاف تدريب العاملين.
▪️ ٤ آلاف إعلان افتتاح خط الإنتاج.

هل أجمع كل ده وأقول تكلفة الماكينة ١٣٢ ألف؟

لأ… ارتباط المصروف بالمشروع مش كفاية عشان أضيفه للأصل.

النقل والتركيب والاختبار اللازم في مثالنا بيجهّزوا الماكينة نفسها للاستخدام؛ فبيدخلوا في تكلفتها.

لكن تدريب العاملين والإعلان بيتسجلوا مصروفات، حتى لو حصلوا قبل بداية الإنتاج.

يبقى:

تكلفة الماكينة = ١٠٠ + ٨ + ١٢ + ٣ = ١٢٣ ألف.(هيتسجل اصل في قايمه المركز المالي Balance sheet )

مصروفات التدريب والإعلان = ٥ + ٤ = ٩ آلاف.( مصروف في قايمه الأرباح والخسائر Profit and loss )

طيب خد بالك من حتة بتلخبط هنا 👈

لو الماكينة طلّعت منتجات أثناء الاختبار، والشركة باعتها… هل أخصم إيراد بيعها من تكلفة الماكينة؟

لأ.
إيراد بيع المنتجات دي وتكلفتها بيتعالجوا في الربح أو الخسارة وفق المعايير المطبقة؛ مش بنخصم متحصلات البيع من تكلفة الأصل.
يعني هروح ادخلهم قايمه دخل. ملهمش علاقه بالأصل نفسه بس دا وفقا لل IFRS
انما لو بتذاكر CMA او حاجه تبع GAAP هتلاقيه بيقلل تكلفه الأصل بالمنتجات اللي بتطلع وقت اختبار الأصل 🚨🚨

وفيه نقطة تانية مهمة:

الرسملة — Capitalisation — مش بتفضل مفتوحة لحد أول يوم إنتاج تجاري.

إضافة التكاليف للأصل بتقف لما الماكينة تكون في المكان والحالة اللازمة للاستخدام، حتى لو الإدارة لسه مشغّلتهاش فعليًا.

ودا بيحدد الوقت اللي ببدا احسب فيه الاهلاك بتاعي

عشان كده، وإنت بتراجع فواتير الأصل، اسأل:
«التكلفة دي بتجهّز الماكينة نفسها؟ ولا بتجهّز الناس والسوق لاستقبال إنتاجها؟»

لو مهتمين ننزل فيديو شرح مع حاله عمليه عن معيار IAS 16 ونتوسع فيه اكتبوا في التعليقات IAS16

12/10/2026

هو أنا ممكن يكون عندي ماكينة… بس ما عنديش إهلاك مقابل ليها؟ 🤔

الحقيقة يا عزيزي، أيوه ممكن!

طيب إزاي؟ 🚨
خلينا نفهم 👇

لما الشركة بتشتري ماكينة عشان تستخدمها في الإنتاج، بتسجّلها أصل، ووفقًا لمعيار IAS 16 بتبدأ تحسب إهلاكها من وقت ما تكون جاهزة للاستخدام.

يعني بصورة أبسط:
بدل ما أحمّل تكلفة الماكينة كلها على سنة واحدة، بوزّع المبلغ القابل للإهلاك على الفترات اللي الشركة بتستفيد فيها منها.

وخلي بالك 👈🏻 الإهلاك مش فلوس بدفعها كل سنة؛ ده توزيع محاسبي لتكلفة الأصل.

طيب لنفترض إن الإدارة قالت:
«إحنا عاوزين نجدّد… نجيب ماكينة حديثة بتشتغل بالـAI 😂
فيلا نبيع الماكينة القديمة ونجيب الجديدة».

ركّز هنا يا عزيزي 👈🏻 الإدارة بقى عندها نية البيع.

هل كده أوقف الإهلاك وأغيّر تصنيف الماكينة؟
لسه!

الأول أروح أشوف شروط معيار IFRS 5؛ لأن الماكينة ممكن يتغيّر تصنيفها من:
Property, Plant and Equipment — PPE
ممتلكات وآلات ومعدات

إلى:
Held for Sale — أصل محتفظ به للبيع.

الفكرة هنا إن الشركة بقت هتسترد قيمة الماكينة أساسًا من بيعها بدل الاستمرار في استخدامها.

بس عشان التصنيف ده يتحقق، لازم شروطه تتوافر، وأهمها 👇

▪️ الإدارة المختصة ملتزمة بخطة البيع، مش مجرد فكرة اتقالت في اجتماع.

▪️ الماكينة متاحة للبيع فورًا بحالتها الحالية؛ مش مستنيين نعمل لها عمرة أساسية عشان تبقى جاهزة للبيع.

▪️ بدأنا نسوّقها وندور على مشتري بسعر مناسب لقيمتها العادلة؛ يعني فيه خطوات فعلية للبيع.

▪️ البيع مرجّح بدرجة عالية، ومتوقع يتم عادةً خلال سنة، مع وجود استثناءات محددة.

▪️ والخطوات اللي بناخدها بتشير إن الخطة مش متوقع تتغيّر بشكل جوهري أو تتلغي.

أول ما الشروط دي تتحقق، بنصنّف الماكينة كمحتفظ بها للبيع… ومن نفس التاريخ بنوقف الإهلاك 🚨

طيب هتظهر في القوائم فين وبكام؟ 👇

أولًا 👈🏻 أتأكد إن القيمة الدفترية متحدثة.

يعني أكون حسبت الإهلاك لحد تاريخ التصنيف، وسجّلت أي تعديلات لازمة وفقًا للمعايير المطبقة قبل الانتقال لمعالجة IFRS 5.

ثانيًا 👈🏻 أقارن بين رقمين:

القيمة الدفترية للماكينة.
والقيمة العادلة ناقص تكاليف البيع.

ونسجّلها بالأقل بينهم.

خلينا ناخد مثال:

القيمة الدفترية بعد تحديثها = ١٠٠ ألف.
القيمة العادلة = ٩٠ ألف.
تكاليف البيع المتوقعة = ٥ آلاف.

يبقى:
٩٠ − ٥ = ٨٥ ألف.

نقارن الـ٨٥ ألف بالـ١٠٠ ألف…
ونسجّل الماكينة بـ٨٥ ألف.

طيب الفرق، الـ١٥ ألف، هيروح فين؟ ⁉️

يتسجّل خسارة انخفاض في القيمة — Impairment Loss في قائمة الدخل.

🚨 وخلي بالك:
لو القيمة العادلة ناقص تكاليف البيع كانت أكبر من القيمة الدفترية، هسيب الماكينة بالقيمة الدفترية؛ مش هزوّد قيمتها لمجرد إني صنّفتها للبيع.

ثالثًا 👈🏻 أغيّر مكان عرضها في قائمة المركز المالي.

أعرضها بشكل منفصل ضمن الأصول المحتفظ بها للبيع، بدل ما تفضل ضمن بند الآلات والمعدات.

ونرجع للنقطة اللي بدأنا بيها 👇

الماكينة لسه عندي ولسه ما اتباعتش… لكن من تاريخ استيفاء شروط التصنيف، مش بحسب عليها إهلاك جديد.

الإهلاك القديم ما اتلغاش؛ ده بالفعل داخل في حساب القيمة الدفترية اللي بدأنا منها.

📌 المبدأ اللي شرحناه موجود في IFRS 5، وكذلك في US GAAP وفقًا لـASC 360 للأصول طويلة الأجل الخاضعة لقواعد البيع دي.

فلما تسمع «هنبيع الأصل»، افتكر يا عزيزي:
نية البيع لوحدها مش كفاية… لاااازم باقي شروط التصنيف تتحقق.

11/10/2026

اتخرجت من تجارة…
وعارف إنك محتاج تطوّر نفسك، بس مش عارف تبدأ بـ Excel، ولا تراجع محاسبة، ولا تجهّز نفسك للإنترفيو؟ 🎓

قبل ما تختار خطوتك الجاية، محتاج أساس يربط اللي درسته باللي هتعمله في الشغل، ويخلّيك فاهم إزاي العملية المالية بتتحول لقيد، والقيد بيوصل لقوائم مالية، والأرقام دي بتساعدنا ناخد قرارات.

وده اللي بنشتغل عليه في ModEX – Finance Foundations Bootcamp، وسعيدة إني هكون جزء من فريقه كمدرّسة مساعدة «Co-Trainer» 💙

إيه اللي هتتعلمه خلال البرنامج؟

▪️ Finance Foundations & Business English
تبدأ بأساسيات التمويل واللغة الإنجليزية المستخدمة في بيئة الأعمال.

▪️ Excel Foundations for Finance
تبني أساس في Excel يساعدك تتعامل مع البيانات المالية وتطبّق عليه عمليًا.

▪️ Accounting Foundations
تربط خطوات الدورة المحاسبية ببعض؛ من فهم العمليات وتسجيلها، لميزان المراجعة والوصول للقوائم المالية.

▪️ Building, Reading & Presenting Financial Statements
تتعلم إعداد القوائم المالية، وقراءة أرقامها، وعرض المعلومات اللي فيها بوضوح.

▪️ Career Readiness & Next Steps
تجمع اللي اتعلمته، وتحدد إزاي تستعد لسوق العمل وإيه الخطوة المناسبة ليك بعد البرنامج.

🚨🚨هيكون معانا في الرحله دي فريق بيضم مديرين ماليين، ورؤساء حسابات، واستشاريين ماليين، بخبرات بتوصل لأكتر من ٢٠ سنة، ومن بينهم حاصلون على شهادات زي CMA وDipIFR وFMVA وFPAC، بقيادة الأستاذ أيمن رمزي

قيمة تنوع الفريق إنك هتتعلم من ناس بتتعامل مع المحاسبة والتمويل من زوايا مختلفة؛ من تفاصيل الشغل اليومي، لحد إعداد التقارير والتحليل ودعم القرارات.

ومشاركتي هتكون معاكم في:
📌 Finance Foundations & Business English
📌 Accounting Foundations I — Transactions to Records

متحمسة أشارك بخبرتي، وأساعد إن خطوات المحاسبة تبقى مفهومة ومترابطة، وإنك تعرف «ليه بنعمل كده؟» وتقدر تطبّق بنفسك.

البرنامج مجاني لخريجي التجارة والبزنس بخبرة أقل من ٣ سنين، ويشمل:
✅ ٩ محاضرات لايف بإجمالي ٢٧ ساعة.
✅ ٤ تكليفات رئيسية، إلى جانب تدريبات خلال البرنامج.
✅ تقييم نهائي للتعلّم.

🗓 من ١١ أكتوبر إلى ٦ نوفمبر ٢٠٢٦.
💻 أونلاين عبر Google Meet.
🕗 ٨–١١ مساءً بتوقيت السعودية | ٩ مساءً–١٢ منتصف الليل بتوقيت الإمارات.

تفاصيل التقديم من خلال الـ QR الموجود في البوستر، والقبول بعد مراجعة الطلبات. ولو قدمت بالفعل، تابع تأكيد فريق ModEX.

ولو تعرف حد لسه بيبدأ ومحتاج يرتّب اللي اتعلمه ويفهم يطبّقه إزاي، ابعت له البوست 🤍

09/10/2026

اعمل ايه لو أنا حديث تخرج 🚨
شهادات كثير في السوق وانا مش عارف أبدا منين ❌❌❌

كلمتين في السريع ممكن يكونوا مفيدين

09/10/2026

بعد رحلة مليانة Learning، Application، Assignments وCases، وصلنا لآخر Chapter في Financial Modelling Boot Camp.

في الClosing Webinar – BOOT CAMP GRADUATION هنحتفل بالمشاركين، ونعلن عن الـCertificates، ونشارك أهم الـLessons Learned من التجربة.

لكن دي مش النهاية

خلال نفس الـWebinar هنعلن رسميًا عن Finance Foundations Bootcamp، مبادرتنا المجانية الجديدة لخريجي تجارة، والـFresh Graduates، وأصحاب الخبرة الأقل من 3 سنوات، علشان نساعدهم يبنوا Foundation قوية قبل الدخول في Financial Modeling.

الموعد: 9 أكتوبر 2026
الوقت: من 8 إلى 10 مساءً
المكان:Online Live

لينك حضور الـWebinar:
https://meet.google.com/xej-jkue-dxc

سواء كنت جزء من الرحلة السابقة أو لسه بتبدأ طريقك في الـFinance، مستنيينك معانا.

شارك الدعوة مع أي حد ممكن يستفيد من البداية الجديدة.

Address

Dubai/World Trade Center/Sheikh Zayed Road
Dubai

Website

facebook.com

Alerts

Be the first to know and let us send you an email when محاسب بزاوية 180- Hadeer Samaha posts news and promotions. Your email address will not be used for any other purpose, and you can unsubscribe at any time.