24/06/2026
لو سألت أي حد عنده مشروع: انت بتتعامل بالأساس النقدي ولا أساس الاستحقاق؟
غالباً هيقولك "أنا كل معاملاتي كاش" 💵
طيب خليني أسألك سؤالين..
السؤال الأول:
الإيجار أو أي مصروف بتدفعه مرة واحدة في السنة..
بتسجله كله كمصروف على الشهر اللي دفعت فيه؟
لو الإجابة "آه"..
يبقى انت بتحمّل شهر واحد مصاريف سنة كاملة 🔴
الشهر ده هيبان فيه خسارة وهمية
وباقي السنة هتبان أرباح زيادة عن الحقيقة.
الصح إنك توزّع المصروف على الـ 12 شهر..
حتى لو دفعته مرة واحدة.
كل شهر يتحمّل بنصيبه هو بس.
(ده اللي بيتسمى في المحاسبة مصروف مقدم — Prepaid Expense)
السؤال الثاني — وده الأهم:
لو عميل اشترى منك بـ 300,000 جنيه في يونيو
ودفع منهم 100,000 وقت الشراء..
والباقي (200,000) قال هيسدده على دفعات خلال 6 شهور..
إنت بتسجل مبيعات يونيو بكام؟
أغلب الناس بتسجل اللي اتحصّل بس.
يعني يونيو = 100,000 (اللي قبضته)
والـ 200,000 بتتسجل في الشهور اللي هتتحصّل فيها.
بس ده غلط 👇
البيعة دي حصلت في يونيو — كلها.
يعني الـ 300,000 لازم تتسجل مبيعات يونيو
حتى لو لسه مقبضتش غير جزء منها.
الباقي بيتسجل "فلوس لينا عند العميل" (مديونية / ذمم مدينة)
عشان تعرف تتابع: حصّلت كام وباقي كام.
بس ده حاجة، والمبيعات حاجة تانية خالص.
ده اللي اسمه أساس الاستحقاق.
ببساطة كده الفرق بين الاتنين:
📊 أساس الاستحقاق:
بتسجل الإيراد لما تكسبه فعلاً (وقت ما البيعة تحصل)
وتسجل المصروف لما يحصل فعلاً (وقت ما تستفيد منه)
بغض النظر عن حركة الفلوس.
💵 الأساس النقدي:
بتسجل الإيراد لما تقبض
وتسجل المصروف لما تدفع.
المعيار الوحيد عندك = الفلوس دخلت ولا خرجت.
طيب ليه الفرق ده مهم لمشروعك؟
لأن أساس الاستحقاق بيخلي كل شهر يتحمّل بإيراداته ومصاريفه وتكاليفه لوحده..
وده اللي بيخليك تتابع أرباحك صح وتاخد قرار سليم.
تخيل عملت حملة إعلانية في يونيو
وجابت مبيعات حلوة — بس بالأجل.
لو سجّلت المبيعات دي وقت التحصيل (مش وقت البيع)
هيبان في تقاريرك إن يونيو كان شهر ضعيف
والحملة فشلت..
وانت ممكن توقف حملة كانت بتكسبّك
وانت فاكر إنها بتخسّرك.
ده الفرق بين رقم بيقولك الحقيقة..
ورقم بيضللك من غير ما تحس.
لو حابب تنظّم حسابات مشروعك على الأساس الصح..
أو عندك أي استفسار — تواصل معانا على رسائل الصفحة 📩
#محاسبة
