13/04/2026
سؤال أنترفيو .. ايه الفرق بين (المخصص) و (الاحتياطي) ؟
----------------------
أولاً : المخصص
• يُعالج كمصروف بيقلل الربح .. وبنعمله عشان نقابل التزام أو خسارة متوقعين في المستقبل ، بس مش عارفين مبلغهم كام بالظبط أو وقتهم ايه
• المخصص لازم يتعمل (إجباري) لو فيه التزام أو خسارة متوقعة مستوفية الشروط .. وده سواء الشركة كسبانة أو خسرانة ، عشان ميزانيتك تطلع بتعبر عن الواقع وبتطبق مبدأ (الحيطة والحذر)
• بيأثر على (قائمة الدخل) كمصروف بيقلل الربح ، وبيظهر في الميزانية كالتزام متداول (أو) بيطرح من قيمة أصل
• بنعمله عشان نحمل الفترة بالخسارة المتوقعة
• المخصص بيتم قبل حساب الربح
• أمثلة : (مخصص قضايا مرفوعة على الشركة ، مخصص الديون المشكوك في تحصيلها، مخصص ضمان صيانة ، مخصص هبوط أسعار مخزون، مخصص مكافأة نهاية الخدمة)
----------------------
ثانياً : الاحتياطي
• هو توزيع للربح .. يعني (حصالة) بنقتطع فيها جزء من أرباحنا عشان نقوي المركز المالي للشركة ، أو عشان نتوسع ، أو ندعم الشركة ضد أي طوارئ
• الاحتياطي بيتعمل من (الربح بس) .. يعني لو الشركة خسرانة السنة دي ، مفيش حاجة اسمها نعمل احتياطي
• ملوش أي علاقة بمصروفات قائمة الدخل .. وبيظهر في الميزانية في قسم (حقوق الملكية) جنب رأس المال والأرباح المحتجزة
• بنعمله عشان نحتفظ بجزء من الربح المحقق
• الاحتياطي بيتم بعد حساب الربح
• أمثلة : (احتياطي قانوني ، احتياطي عام ، احتياطي توسعات وتجديدات، احتياطي طوارئ)
----------------------
يعني الخلاصة:
المخصص : مصروف (إجباري) عشان نحمي الشركة من خبطة متوقعة ، وبنعمله حتى لو بنخسر
الاحتياطي : اقتطاع من الأرباح (تحويشة) عشان نعمل (ضهر) للشركة تتسند عليه في أي وقت ، ومبيتعملش إلا لو كسبانين
منقول
