31/05/2017
गुंतवणूक करताना नेहमी कुठे गुंतवणूक करावी हा प्रश्न नसतो, तर त्याऐवजी केव्हा गुंतवणूक करावी व कमीअधिक प्रमाणात ती कशी करावी हा खरा प्रश्न असतो.
लोक अधूमनमधून गुंतवणूक करतात खरे, पण नेमके भांडवल बाजार पडला की गुंतवणूक करायचे थांबवतात. बऱ्याच गुंतवणूकदारांच्या बाबतीत हे सर्रास घडते. याचे कारण असे की, समभागांच्या किंमती घसरल्या की प्रसामाध्यमांतून घबराट पसरल्याच्या बातम्या येऊ लागतात. त्यामुळे सर्वसामान्य गुंतवणूकदार बिचकतो. अशा बातम्यांमध्ये काहीच तथ्य नसते. कोणत्याही वस्तूचे ग्राहक म्हणून तुम्हाला कमी किंमतच हवी असते. मग समभागांच्या किंमती कमी झाल्यावरही तुम्ही ग्राहकाच्या भूमिकेत गेले पाहिजे. मात्र असे प्रत्यक्षात होत नाही.
यासाठीच सिस्टिमॅटिक इन्व्हेस्टमेंट प्लॅनचे (एसआयपी) महत्त्व अनन्यसाधारण आहे. वर उल्लेख केलेल्या दोन्ही समस्यांवर एसआयपी तोडगा काढतो. म्युच्युअल फंडांमध्ये पैसे गुंतवण्यासाठी एसआयपीची वाट ही उत्तम वाट आहे. तरीही एसआयपी स्वतः कोणताही म्युच्युअल फंड नसतो. एसआयपी वास्तवात तुमच्या गुंतवणुकीचे चांगले वेळापत्रक ठरते. एसआयपी म्हणजे ठराविक रक्कम नियमित गुंतवणे. अशी गुंतवणूक साधारणपणे दरमहिना केली जाते. ही गुंतवणूक भाडवल बाजाराची स्थिती पाहून किंवा म्युच्युअल फंडाच्या युनिटची एनएव्ही (निव्वळ मत्ता मूल्य) पाहून केली जात नाही. त्यामुळे बाजार पडलेला असताना गुंतवणूकदारांना आपोआपच अधिक युनिट्स मिळतात. यामुळे युनिटसाठी सरासरी कमी किंमत द्यावी लागते, ज्यामुळे परतावा अधिक मिळतो. त्यामुळे एसआयपी ‘स्वस्त खरेदी व अधिक किंमतीला विक्री’ हे गुंतवणूकदारांचे ध्येय पूर्ण करते.
एसआयपीचे गणित चांगले असले तरी, एसआयपीने केलेल्या गुंतवणुकीवर अधिक परतावा मिळण्याचे हेच एकमेव कारण नाही. एसआयपी गुंतवणुकीची मानसिकता ओळखते. इक्विटीमध्ये नियमित गुंतवणूक करून, कधी गुंतवणूक करावी किंवा करू नये या वैचारिक गोंधळात न अडकता चांगला परतावा मिळवण्याचा एसआयपी हा उत्तम मार्ग आहे. बाजार पडल्यावर साघारणतः गुंतवणूक थांबवण्याकडे कल असतो. परंतु एसआ.पी गुंतवणूकदारांपैकी बरेच गुंतवणूकदार बाजार पडलेला असतानाही गुंतवणूक सुरूच ठेवतात. बाजार वर जाऊ लागला की त्यांना गुंतवणूक कायम ठेवल्याचे महत्त्व कळून येते.
एसआयपीने गुंतवणूक
एनएव्ही न पाहता केलेली नियमित गुंतवणूक म्हणजे एसआयपी होय. त्यामुळे बाजार खाली असताना गुंतवणूकदारांना अधिक युनिट्स मिळू शकतात. उदाहरणार्थ, तुम्ही दर महिन्याला १० हजार रुपये गुंतवत आहात. ज्यावेळी एनएव्ही प्रति युनिट २० रुपये होईल, तेव्हा तुम्हाला ५०० युनिट्स मिळतील. समजा, बाजार खाली आला आणि त्याच युनिटची एनएव्ही १६ रुपये झाली तर तुम्हाला ६२५ युनिट्स मिळतील. म्हणजेच तुम्ही आपोआपच अधिक युनिट्स खरेदी केले असे होईल. तुमची गुंतवणूक तुम्हाला विकायची असेल तर हे सर्व युनिट्स तुम्हाला विकता येतील. अशावेळी कमी किंमतीला तुम्ही अधिक युनिट्स खरेदी केले असल्याने (तुम्हाला बाजार पडल्याचा फायदा होऊन तसे युनिट्स मिळाले असल्याने) ते विकताना तुम्हाला अदिक फायदा होईल. म्हणजे तुम्ही सरासरी कमी किंमत अदा केलीत, मात्र तुम्हाला अधिक परतावा मिळाला.
Credits : Maharashtra times
