26/03/2026
TAX AMNESTY SA REAL PROPERTY
TAXES, GITANYAG SA SYUDAD
Nagtanyag karon ang lokal nga kagamhanan sa syudad og tax amnesty alang sa mga real property taxpayers sa Cagayan de Oro nga adunay delingkwente sa ilang bayronon.
Subay niini, giaghat ni Acting City Treasurer Engr. Leonil Mistula ang mga tag-iya og kabtangan sa syudad nga adunay mga delingkwente sa ilang bayronon sa real property tax nga pahimuslan ang maong tax amnesty.
Gipasabot ni Engr. Mistula nga ang deadline sa tax amnesty matapos karong Hulyo 5, 2026.
Nalakip sa tax amnesty ang penalties, surcharges ug interest sa tanang real property taxes nga wala pa nabayaran o’ natingob hangtud Hulyo 5, 2024, sumala ni Engr. Mistula.
Hinoon, makapili ang taxpayer sa pagbayad sa iyang delingkwente pinaagi sa one-time payment o’ kaha installment plan, dugtong pa sa opisyal.
Ang pagtanyag sa tax amnesty pinasikad sa pagpatuman sa syudad sa Republic Act 12001 kon Real Property Valuation and Assessment Reform Act o’ RPVARA.
Ubos sa maong balaod, gitahasan ang buhatan ni Acting City Assessor Atty. Chit Leonelle Isaiah R. Bañas pag-andam sa Schedule of Market Values kon SMV nga mahimong nang sumbanan sa real property tax (RPT) ug related national taxes, sama sa capital gain tax, ug dili na mag-depende sa BIR zonal values. (CIO)
