04/08/2025
Nilinaw ng na hindi ganap na exempted sa pagbabayad ng Value-Added Tax (VAT) ang mga negosyong nakarehistro sa Philippine Economic Zone Authority (PEZA).
Sa isang Desisyon na isinulat ni Associate Justice Japar B. Dimaampao, bahagyang pinagbigyan ng Ikatlong Dibisyon ng Korte Suprema ang claim ng Coral Bay Nickel Corporation (Coral Bay) para sa VAT refund.
Rehistrado sa PEZA ang Coral Bay, na isang domestic company na gumagawa at nag-e-export ng nickel at cobalt mixed sulfide. Humingi ito ng refund mula sa Bureau of Internal Revenue (BIR) para sa hindi nagamit na input VAT na binayaran nito para sa mga kalakal at serbisyo na ginagamit sa labas ng PEZA zone (ecozone).
Karaniwang nagbabayad ang mga negosyo ng VAT sa mga produkto at serbisyo na kanilang binibili, na tinatawag na input VAT, at sa mga produktong kanilang ibinebenta, na tinatawag na output VAT, na kanilang ipinapasa sa kanilang mga kustomer.
Sa pagtatapos ng tax period, ibinabawas nila ang kanilang input VAT mula sa kanilang output VAT at babayaran ang pagkakaiba sa gobyerno.
Nabigo ang BIR na aksyunan ang refund claim ng Coral Bay na nag-udyok sa kumpanya na dalhin ang kaso sa Court of Tax Appeals (CTA).
Itinuring nito ang Coral Bay bilang ganap na exempted sa VAT. Kaya, ang mga pagbili nito ay itinuring na zero-rated, na ginagawa itong hindi karapat-dapat para sa isang refund ng VAT.
Binaliktad ng Korte Suprema ang CTA En Banc at nagpasya pabor sa Coral Bay.
Sa ilalim ng Republic Act No. 7916, o ang Special Economic Zone Act of 1995, as amended, exempted ang mga kumpanya ng PEZA sa pambansa at lokal na buwis, maliban sa buwis sa real property sa lupang pag-aari ng mga developer.
Gayunpaman, hindi kasama sa exemption na ito ang VAT.
Maaaring mag-claim ng zero-rated na VAT sa ilalim ng cross-border na prinsipyo ang mga kumpanyang nagpapatakbo sa loob ng ecozones na itinuturing ng batas bilang dayuhang teritoryo. Sinasabi ng prinsipyong ito na walang VAT na sinisingil sa mga produkto o serbisyo na nilalayon para gamitin sa labas ng nagbubuwis na bansa.
Sa kaso ng Coral Bay, sa labas ng ecozone nakonsumo ang mga binili nito pero sa loob ng teritoryo ng Pilipinas. Dahil napapailalim sila sa VAT, may karapatan ang Coral Bay sa refund para sa hindi nagamit na input VAT.
Basahin ang buong Press Release sa https://tinyurl.com/bdh64f22.
Basahin ang buong Desisyon sa https://tinyurl.com/bdz8sa8z
Sumunod sa Credit Attribution Policy ng SC PIO: https://sc.judiciary.gov.ph/credit-attribution-policy/.
