19/03/2026
გვინდა გაცნობოთ, რომ 2026 წლის 24 თებერვალს შევიდა ცვლილება საგადასახადო კანონმდებლობაში, რომლის თანახმად მარტის თვის მოგების დეკლარაციაში წარდგენილი უნდა იქნეს ინფორმაცია კომპანიის მიერ გასული წლის განმავლობაში განხორციელებული საერთაშორისო კონტროლირებული (ურთიერთდამოკიდებულ პირებთან) ოპერაციების შესახებ. კერძოდ, თუ კომპანიას ურთიერთდამოკიდებულ პირთან განხორციელებული აქვს ერთი ან რამოდენიმე ფინანსური, ან კომერციული ოპერაცია:
- საქონლის/მომსახურების მიწოდება/შესყიდვა;
- აქტივების მიწოდება/შესყიდვა;
- მიღებული/გაცემული სესხი;
- საპროცენტო შემოსავალი/ხარჯი;
- მიღებული/გაცემული გარანტია;
- გადახდილი/მიღებული როიალტი;
- ბიზნესის რესტრუქტურიზაცია.
- სხვა ფინანსური da კონტროლირებული ოპერაციები, მათ შორის უსასყიდლოდ განხორციელებული და ბარტერული ოპერაციები;
და 2025 კალენდარული წლის განმავლობაში, ამ ოპერაციათა ჯამური ღირებულება აღემატება 500 000 ლარს, კომპანია ვალდებულია მარტის თვის დეკლარაციაში წარადგინოს:
- ინფორმაცია ხელშეკრულების დადების თარიღის, მოცულობის, ვალუტის და დებიტორული/კრედიტორული დავალიანების შესახებ;
- კონტრაქტორი (ურთიერთდამოკიდებული) პირის დასახელება, საიდენტიფიკაციო ნომერი, რეზიდენტობა და ურთიერთდამოკიდებულების ფორმა.
- ინფორმაცია ოპერაციების შეფასებასთან დაკავშირებული დოკუმენტაციის ფლობის შესახებ (მაქვს/არ მაქვს/მზადდება/ვაპირებ მომზადებას)
500000 ლარ ჯამურ მოცულობაში გაითვალისწინება ასევე უსასყიდლოდ გაწეული კონტროლირებული ოპერაციების საბაზრო ღირებულება და არსებული კრედიტორული ან/და დებიტორული დავალიანების მოცულობა.
საგადასახადო კოდექსი ურთიერთდამოკიდებულ პირებს შორის დადებულ ნებისმიერ გარიგებას განიხილავს კონტროლირებად ოპერაციად, ხოლო პირებს ურთიერთდამოკიდებულად განიხილავს თუ:
- პირი პირდაპირ ან არაპირდაპირ ფლობს საწარმოს 50 პროცენტზე მეტს;
- პრაქტიკულად ახორციელებს საწარმოს სამეწარმეო გადაწყვეტილებების კონტროლს;
- ერთი და იგივე პირები პირდაპირ ან არაპირდაპირ მონაწილეობენ ორი პირის მართვაში, კონტროლში ან კაპიტალში.
- პირებს პირდაპირ ან არაპირდაპირ აკონტროლებს მესამე პირი;
- პირები ერთად, პირდაპირ ან არაპირდაპირ აკონტროლებენ მესამე პირს;
ა) პირები არიან ერთი საწარმოს დამფუძნებლები (მონაწილეები), თუ მათი ჯამური წილი არანაკლებ 20 პროცენტია;
- პირი შეღავათიანი დაბეგვრის მქონე ქვეყნის რეზიდენტია:
- პირს აქვს მუდმივი დაწესებულება (ფილიალი, წარმომადგენლობა და სხვა);
კონტროლი გულისხმობს: სამეთვალყურეო საბჭოს წევრობას, დირექტორობას და ამ თანამდებობებზე პირების დანიშვნის უფლებას; ხმის უფლების მქონე წილის ან აქციების 20 პროცენტის ფლობას.
გამომდინარე აქედან, გარიგების ფასსა და საბაზრო ფასს შორის შეუსაბამობის შემთხვევაში, არსებული სხვაობა დაიბეგრება მოგების გადასახადით 15%-ის ოდენობით.
